من طرف shab men hokok السبت يوليو 03, 2010 6:35 pmا شاب لكن عمرى ولا الف عام
وحيد ولكن بين ضلوعى زحام
خايف ولكن خوفى منى انا
اخرص ولكن قلبى مليان كلام
وعجبى
******************
سهير ليالى وياما لفيت وطفت
وفى ليله راجع فى الظلام قمت شفت
اخوف كأنه كلب سد الطريق
وكنت عاوز اقتله بس خوفت
وعجبى
******************
يا طير يا عالى فى السما طظ فيك
متفتكرش ربنا مصطفيك
بردك بتاكل دود وللطين تعود
تمص فيه يا حلو ويمص فيك
وعجبى
******************
كرباج سعاده وقلبى منه اتجلد
رمح كأنه حصان ولف البلد
ورجعلى اخر الليل وسألنى ..ليه
خجلان تقول انك سعيد يا ولد
وعجبى
****************
قالو الشقيق بيمص دم الشقيق
والناس مهياش ناس بحق وحقيق
قلبى رميته وجيبت غيره حجر
داب الحجر ورجعت قلبى رقيق
وعجبى
*****************
انشد يا قلبى وقول غنوتك للجمال
وارقص فى صدرى من اليمين للشمال
ماهوش بعيد تفضل لبكره سعيد
ده كل يوم فيه الف الف احتمال
وعجبى
******************
اهوى الهوى وهمس الهوى فى العيون
وبسمه المغرم ودمع الحنون
وزلزلات الحب نهد الصبا
اكون انا المحبوب او لا اكون
وعجبى
*******************
انا اللى بالامر المحال اغتوى
شفت القمر نطيت لفوق فى الهوا
طلته مطلتوش ايه انا يهمنى
وليه مادام بالنشوى قلبى ارتوى
وعجبى
*******************
غمض عينيك وارقص بخفه ودلع
الدنيا هى الشابه وانت الجدع
تشوف رشاقه خطوتك تعبدك
لكن انت لو بصيت لرجليك ... تقع
وعجبى
*******************
فتحت شباكى لشمس الصباح
مدخلش منه غير عويل الرياح
وفتحت قلبى علشان ابوح بالالم
مخرجش منه غير محبه وسماح
وعجبى
*******************
ليه يا حبيبتى مابينا دايما سفر
ده البعد ذنب كبير لا يغتفر
ليه يا حبيبتى مابينا دايما بحور
اعدى بحر الاقى غيره اتحفر
وعجبى
*****************
